康文署健身室使用資格申請流程攻略2024

康樂及文化事務署（下稱康文署）健身室絕對係入門健身必選埸地，唔止因為區區都總有一間，最重要係入場收費平，平均每日都只係幾蚊，平過你買個麵包。

不過想去康文署健身室玩，唔係就咁畀錢行入去就得，首先你要獲得康文署健身室使用資格，不過大家又唔使驚，康文署健身室使用資格唔難獲得，呢篇文章會教大家點樣申請。

康文署健身室使用資格

1. 參加並通過測試康文署舉辦「正確使用健身室設施簡介會」；
2. 曾參加康文署由二零零六年五月或以後舉辦的「器械健體訓練班」出席率達80%或以上；
3. 持有康文署健體金卡；或
4. 持有各大體育總會舉辦的導師／教練證書課程；
5. 持有各大學、院校相關體適能課程或該院校健身室使用證

由於第4及第5項太多課程都適用，所以唔詳細講，簡單講如果你已經讀過有關體適能課程，已經好大機會直接用得康文署健身室，可以去睇詳細康文署認可資歷名單，如果你有以上資格，就要將填妥的表格(編號LCS 777) 連同有關資歷的證書╱證明文件副本，一併交回康文署各體育館辦理登記手續，咁就已經有資格用康文署健身室。

如果你仲係白紙一張乜都冇讀過，咁只有兩個方法用到康文署健身室，就係第1及第2項，兩個課程有咩分別呢?下面繼續講。

正確使用健身室設施簡介會

「正確使用健身室設施簡介會」免費參加，課程內容相對簡單直接，就係教你點樣正確使用各種健身器材，等大家有基本知識同概念，唔好健身時用錯方法而受傷。

呢個課程只係需要上1日，全個課程3個鐘就完成，但完結之前要進行一個小測試，測試係以筆試形式進行，只要有留心上堂都應該會識答，非常簡單。

器械健體訓練班

器械健體訓練班收費為每人$75，課程內容比較全面，會教你使用健身器材同訓練方法等，不過全個課程分開幾日進行，平均每星期上3日，每日上1個鐘，雖然實際全程只係上5個鐘堂，但要接近兩星期先完成，比較浪費時間。

當你完成以上兩個短課程之後，就符合資格使用康文署健身室。順帶一提，上面講第3項康文署健體金卡係乜呢? 康文署個網站冇詳細講，原本以為係為退休人士而設，但網上面搵到一篇審計署報告講，只要年滿18歲，完成以上兩個康文署課程其中一個，並通過評核證明識用健體器材，即可免費獲發健體金卡，而康文署健身室的使用者，必須是健體金卡計劃會員。

康文署健身室課程報名方法

前往康文署社區康樂體育活動網頁，輸入並搜尋正確使用健身室設施簡介會或器械健體訓練班，就會顯示最新課程資料，可根據適合自己時間及地區去選擇。留意返，課程報名有分先報名先得及抽籤形式，而報名方法包括:

1. 親臨任何分區康樂事務辦事處報名；
2. 親臨設有康體通服務的康體場地報名，設有康體通服務訂場處名單睇呢度；
3. 郵遞報名；
4. 透過康體通自助服務站報名 (只適用於持有效香港身份證人士)，自助服務站地點睇呢度。
5. 登入康體通網頁報名。

康文署健身室可預約嗎?

康文署健身室目前不提供預約服務，所有健身室都設有月票及時票入場人數上限，並以先到先得方法進場，如果想確保某繁忙時段能夠入場健身，唯一辦法係買時票。

康文署健身室月票點申請

想買康文署健身室月票其實唔使申請，只要你符合康文署健身室使用資格，到任何一間體育館訂場處同職員講想買健身室月票，咁就買到。

至於康文署健身室月票收費幾錢，就視乎你係半價優惠人士定一般使用者，目前健身室月票一般使用者收正價係$180，用每月30日去計，每日平均只係$6。如果你係全日制學生、60歲或以上長者、殘疾人士及其同行照料者更加只需$90，由購買日起計至下個月前一天內，可無限次使用康文署健身室。

提提大家，某些健身室係康文署指定月票計劃使用場地，基本上除清潔、維修時段，幾時去都有得做。但某些非指定健身室，好多時會加插健身班或被團體租用，為免摸門釘出發前最好上網查清楚場地開放時間。

>> 月票計劃指定場地 睇呢度 <<

除咗使用月票，亦可以按自己需要而選擇買時票，正價每小時收費都只係$13(非繁忙時間)或$14(繁忙時間)。

延伸閱讀: 各大香港健身室比較及介紹