考健身教練牌體適能證書課程
想喺香港做健身教練，其實唔一定持有相關健身教練牌，因為香港目前為止並無相關牌照制度，所謂嘅「牌」即係體適能證書，做健身教學並唔係強制要持有，不過多張「沙紙」證明自己有健身相關嘅知識，對於投身做健身教練都肯定有幫助，尤其想做私人教練嘅朋友仔。
雖然想從街外健身室入行做健身教練唔一定手持相關證書，但如果你想喺政府部門做教練，例如康樂及文化事務署（下稱康文署）嘅「正確使用健身室設施簡介會」、「器械健體訓練班」教吓班或做駐場教練，咁就需要持有下面所講指定證書先得。
目前政府認可嘅「健身教練牌」體適能證書課程應該只有以下2個 (康文署官方寫明)，有啲網站話共有4個課程獲認可，但我哋睇過嗰啲課程資料，並無列明獲康文署認可，所以建議大家報讀其他未獲肯定嘅課程前，先向相關機構查詢，或者如果有朋友仔有肯定答案嘅話，都歡迎你同大家分享。
香港浸會大學持續教育學院-體適能導師證書課程
入學資歷要求
- 完成中五或具同等學歷；或
- 持有本院頒發的相關證書或同等學歷；或
- 年滿18歲。
體適能課程讀幾耐？
浸大持續教育學院體適能證書課程係兼讀制，全個課程由11個科目組成，合共120小時，約6個月完成，課程用粵語授課，輔以英語教材，呢個課程除咗理論課之外仲有實習堂。
體適能課程有咩特別?
- 浸大持續教育學院體適能證書課程獲康文署認可，成功修畢本課程的學員符合申請成為康文署教練資格，亦獲國際運動、帶氧訓練及體適能聯邦協會 (FISAF) 及多個國家認可。
- 修讀完成本課程可獲持續進修基金資助。
- 呢個課程已有超過20年歷史，教學內容偏向運動科學方向，比較著重學術，學嘅運動理論較全面。
- 讀完呢個課程嘅學員只需於亞洲運動及體適能專業學院 (AASFP) 完成部份指定課程，便可獲頒發高級私人體適能教練證書。
- 體適能導師證書永久有效
了解更多: 香港浸會大學持續教育學院
中國香港體適能總會-器械健體導師證書
入學資歷要求
- 18歲或以上
- 持有該會「體適能基礎證書」
- 持有成人心肺復甦法證書或同等資歷
- 通過該會的「PFA 體適能綜合評核」
器械健體導師班讀幾耐？
中國香港體適能總會「器械健體導師證書課程」會用粵語授課，需要輔以英語進行，平均每星期上一堂，大約10個星期修畢整個課程。
器械健體導師班有咩特別？
- 中國香港體適能總會「器械健體導師證書課程」已獲康文署認可，成功修畢本課程的學員符合申請成為康文署教練資格。
- 課程內容以健身器械正確操作方法及運動科學為主。
- 要先持有中國香港體適能總會嘅「體適能基礎證書」先可以讀。
- 器械健體導師證書由成績發布日起計有效期只有4年。
- 課程收費較平。
了解更多：中國香港體適能總會
延伸閱讀: 如果你純粹想搵健身室做gym，可以睇呢篇文章留意 各大香港健身室比較及介紹
