再有健身室大件事?! PURE fitness唔止中環店欠租、觀塘店都欠租！健身會員要留心，會否步舒適堡後塵?

PURE fitess欠租事件時間線

PURE fitness 兩分店前後欠租遭入稟

2024年8月20日，有香港媒體報道PURE fitness 中環店欠租及拖欠管理費、差餉、新會員稅等雜費，連同利息近HK$1,300萬，引致業主入稟追數。欠租事件看似單一事件，事實真係可大可少，隨時火燒連環船，舒適堡Physical Fitness 已經係一個樣版，2024年4月其中環店亦因欠租而閉門，最終拖到同年9月終於頂唔順而全線關門大吉。無獨有偶，9月10日媒體另有報道，PURE fitness 觀塘店亦遭業主入稟高等法院追討約HK$849萬元欠租連雜費，雖然該公司同日已發聲明指已經同業主違成協議，業主已撤回訴訟，事件經已解決，但接二連三爆出欠租消息，難免令人擔憂其財務狀況。

睇返PURE fitness 官方網站及其他傳媒網站嘅介紹，佢哋2002年喺香港起家，當時只係一間瑜伽店，之後慢慢擴展至全球多地幾十間分店，絕對算係本港其中一間具有相當歷史嘅健身品牌，一直以來都有唔錯口睥，PURE fitnesss 特別針對高端客群，分店選址大部份都集中喺香港島商業核心地段，單係中環都有幾間分店，而且間間面積都唔算細，場內器材亦相對新淨，可想而知成本都唔低。

既然針對高端客群，PURE Fitness 嘅月費對比其他連鎖健身店都算數一數二地高，如果冇記錯嘅話，早幾年睇佢地官網收費資料，月費好似係按分店去計，即係你買邊間分店會籍就只可以用邊間，可能大把有錢人唔太在意一千幾百，唔似普羅大眾咁揀247只係貪佢總有一間喺附近。直到呢一兩年先見佢哋一個月費通行全線分店，不過月費都要HK$2,099起(2024年8月數據)，仲要簽12個月約，一次過繳付12個月費用，另外收HK$2,000一次性入會手續費，即係如果你想獲得最低月費，新會員就要一次過畀HK$27,188，相對現時大部份連鎖健身室平均每月收費大約HK$500，PURE 健身室呢個月費價格，可能只吸引到高端健身人士去玩，反而縮窄咗佢哋嘅收入來源範圍。

有傳媒報道話，PURE 執行主席歸咎疫前租約不合理，照咁睇即係一直都捱緊貴租，只係以往客流足夠仍然有利可圖，疫後本港經濟轉差，而且有經濟能力既中產少咗好多，結果影響到佢哋嘅收入。雖然PURE 會員肉隨砧板上冇乜野可以做到，但未入會或者準備續會藉嘅人就要多加留意，要認真考慮清楚先。