近年香港越開越多健身室，開到成行成市，好似便利店咁「總有一間喺左近」。不過咁多間健身室反而令人唔知揀邊間好，所以我哋就搵咗香港幾間大型健身室比較一下，睇吓幾間健身室比較起嚟有咩分別，方便大家做決定。
揀香港健身室注意要點
- 健身室價錢：價錢對某啲人嚟講可能唔太重要，不過最好就一分錢一分貨甚至兩分貨嘅健身室啦。
- 健身室收費模式：健身室係按次收費、按月收費抑或按年收費呢？
- 健身室分店數量：分店數量越多代表越方便就腳，唔只要近屋企，亦可留意自己公司或常去嘅地區有冇分店。
- 健身器械種類：健身器械種類是否齊全絕對會影響你嘅健身成效同進度，揀一間有齊各種類器械嘅健身室非常重要，而且啲機越新款越好。
- 使用健身室資格：留意有冇設特定要求先可使用健身室，或者是否需要購買會籍等。
- 是否需要簽約：留意購買健身室會籍係咪需要簽約，而合約年期亦需留意。
- 健身室營業時間：現時好多健身室都有24小時開放，不過有啲都仲係指定開放時間，留意健身室開放時間係咪就到自己嘅空餘時間。
知名香港健身室介紹
以下各健身室按首字母排名，所有資料取自該品牌官網（截至07/2024）。
24/7 Fitness健身室
24/7 Fitness係24小時開放健身室，賣點係「三無」：無需預繳、無入會費、無隱藏收費，會籍收費都明碼實價清楚列晒喺佢哋個官網，包保唔會比人呃。同樣地24/7 Fitness都係特許經營制度，每間分店都有唔同老闆，官網有清楚列明各分店嘅聯絡資料。
24/7 Fitness月費價錢及會籍
24/7 Fitness收費按你購買月籍嘅時間而定，最平可低至HK$520/月，分別係：
- 1月個健身會籍：HK$1,020/月
- 6月個健身會籍：HK$720/月
- 12月個健身會籍：HK$520/月
除咗1個月健身會籍無需簽約之外，其餘兩個會籍計劃都需要簽約，不過所有會籍計劃依然係每個月交一次錢，唔使一次過畀晒。除此之外，由即日起至24年12月31日止，任何會員續約加簽一年合約會送多一個月、加簽兩年合約會送多兩個月會籍。
24/7 Fitness設有免費1天健身試玩，只需要喺佢哋個官網登記簡單資料即可。
24/7 Fitness健身室分店
目前為止24/7 Fitness係全港最多分店私人健身室，共有110間分店(計及正在裝修即將開幕分店)，想知24/7 Fitness 分店位置可以撳入條link去官網睇睇。
Anytime Fitness健身室
Anytime Fitness係一個國際品牌，全球各地都見到佢哋嘅蹤影，賣點係24小時開放健身室，會員買咗會籍30日之後，可使用其他國家Anytime Fitness分店，但因為全部分店都係特許經營，售後服務未必一樣質素，官網有清楚列明各分店嘅聯絡資料，有事想問都算方便。
Anytime Fitness月費價錢及會籍
Anytime Fitness嘅月費並無喺官網中列明，以我哋所知係實行簽合約+月費制，即簽訂某使用年期並按月交錢，現時月費最平應大約HK$5xx，確實收費需要自己問問各分店。
大部份分店有提供1天免費試用，詳情可以撳入條link去官網，輸入地區並揀選分店後，填寫簡單個人資料即可。
Anytime Fitness健身室分店
Anytime Fitness目前有31間分店，集中喺新界及九龍，而港島只有6間分店，撳入呢度搵詳細分店地址。
Fit 24健身室
Fit 24同樣係24小時開放健身室，分店數量相對較少，感覺上少啲人留意呢個品牌，但其實都係性價比高嘅健身室，賣點係無需預繳、全自助化、價錢平，價錢明碼實價清楚列明喺Fit 24官網。
Fit 24月費價錢及會籍
Fit 24嘅會籍計劃相對簡單，採用合約制+按月收費，只有1個月及12個月計劃。依家出街乜都加價，不過對比2023年頭Fit24嘅月費，Fit24竟然減咗價！現時簽約1年嘅平均月費只需HK$298 (之前要HK$349)，不過如果唔簽約而續月計嘅話，月費會增至HK$798(之前係HK$598)。
Fit 24有提供1日免費試用，去官網輸入簡單個人資料及揀選分店即可。
Fit 24健身室分店
Fit 24分店相對上較少，目前只有9間分店，分別喺粉嶺、元朗、將軍澳、葵芳、藍田、尖沙咀、北角、灣仔及旺角。
GO24 Fitness健身室
GO24 Fitness係一間24小時健身室，於2018年初成立，早初得荃灣一間門市，後來逐漸增加至依家嘅8間，最特別係除咗常見嘅月費之外，更有日票、週票可以選擇，大大提高咗使用嘅靈活性。GO24 Fitness 有多種團體課堂，例如全身高強度訓練、各類YOGA、K-POP、普拉提、JAZZ Funk Dance等，平均每堂有10至14人一齊上，呢類課堂月費已經包咗，上佢哋個官網預約就得，除此之外仲有一對一教練課程、物理治療服務。
GO24 Fitness月費價錢及會籍
- 一日通行證：$200
- 每周收費：官網未有顯示
- 單月月費：$638 (註:需最少簽約使用兩個月)
- 6個月費用：$3594，平均每月$299.5
- 12個月費用：$6600，平均每月$550
要留意返，所有月費計劃都需要一次過預繳所有費用，除此之外，仲要另外畀$199整入場用嘅QR Code，以及交$1000按金。
依家Go24 Fitness正提供一次試玩優惠，只需要喺官網登記並填寫基本資料就可以預約指定分店試用。
GO24 Fitness健身室分店
Go24 Fintess目前共有10間分店，其中6間喺港島區、4間喺九龍及新界。包括元朗、荃灣、荔枝角、黃大仙、北角、灣仔、中環、筲箕灣、太古、西環堅尼地城。
Physical舒適堡健身室
【2024年9月】現時Physical已全線結業
Physical係香港早期大型健身室之一，嚟搵城城做代言應該全香港人都識，賣點係平！平均月費只係一百幾十蚊，仲平過康文署健身室。不過平係有代價嘅，唔少人反映Physical經常sell課程同會籍，同埋唔係24小時開放。
Physical月費價錢及會籍
以連鎖私人健身室嚟講，Physical價錢應係算係最平之一，佢哋嘅收費模式係預繳形式，網站廣告顯示平均月費只需HK$125，就可以使用佢哋全線分店(美孚分店除外)，以我哋所知以上優惠係HK$1,000/8個月。
不過我哋都留意到Physical有銷售員負責做推廣，就好似電訊上台服務咁，唔同銷售員提供嘅優惠及服務內容都略有分別，所以入會前不妨去多幾間分店先格價。
Physical設有免費7天健身試玩，詳情可以去門市問吓。
Physical健身室分店
Physical目前喺香港共有15間分店，不過最近好似越執越多間分店，繼中環店、西環店之後，官方宣布樂富店只會營運至24年9月底(原址由24/7接手營運)，觀塘店亦已關閉，意味東九龍區只剩新蒲崗分店。
想Join Physical 嘅朋友要留意，喺2023年5月11日有一單關於該公司嘅新聞，詳細請睇：Yahoo!新聞《舒適堡中環分店被指欠租1個月 業主入稟追逾77萬》
PURE Fitness健身室
PURE 係一間主攻高端市場嘅健身室，收費對比其他牌子會貴啲，但場內健身設施都比較新款同全面，除此之外佢哋嘅瑜伽堂都好出名，唔少女士會去參加，留意佢哋唔係24小時開放。
PURE月費價錢及會籍
PURE 嘅收費模式係預繳式，分1個月、6個月及12個月等計劃，一個月費可任用全港22間PURE Fitness及PURE YOGA，月費收費如下:
- 1個月：HK$2,800
- 6個月：HK$2,299+HK$2,000一次性入會手續費
- 12個月：HK$2,099+HK$2,000一次性入會手續費
除此之外，持有有效全日制學生證於PURE網頁簽訂三個月合約，即可享特選優惠，呢項優惠只限全日制學生使用，月費HK$1,519，各個月費計劃詳情可以留意Pure Fitness官網。
PURE 現時有5日周末免費試玩健身室優惠，可按連結去佢哋個官網揀選並預約心水分店。
PURE健身室分店
只計健身室唔計瑜伽，PURE Fitness連PURE Yoga目前共有21間分店，單計PURE Fitness有11間，主要集中喺港島區，共佔8間，港島區當中中環更有多達4間分店，其他地區包括淺水灣、銅鑼灣、鰂魚涌、灣仔、牛頭角、尖沙咀、旺角。
不過讀者要留意，2024年8月20日有新聞媒體報道，PURE中環分店欠租遭業主入稟追逾1300萬，至9月10日觀塘店又爆出欠租新聞，引起外界對PURE是否財困的擔憂，有興趣入會的話要多加留意。
有關PURE欠租新聞報道睇呢度
Snap Fitness健身室
Snap Fitness 係一間24/7健身室，目前喺香港共有16間分店，唔只有適用於香港分店通行證，如果你經常去其他國家，更可以選擇全球通行證，包括全球超過2,500間分店任用，入會後有多種免費嘅小組健身課程班可以參加，亦提供營養諮詢及個人訓練等服務，以及一個專為會員而設嘅免費手機app「Snap App」，用於追蹤訓練成效、制成訓練日程和接收訂製食譜等。
Snap Fitness月費價錢及會籍
Snap Fitness官方網站顯示佢哋有兩種收費模式：每星期收費及月費，每星期收費HK$168，每次合約為期4星期；月費為HK$588，每次合約12個月。佢哋提供免費試玩，只要喺官網選擇想去嘅分店，填寫簡單個人資料即可。
Snap Fitness健身室分店
Snap Fitness目前共有17間分店，主要集中喺九龍同新界共11間，港島有6間。
康文署健身室
講得香港大型健身室點少得康文署，因為康文署總共有86間健身室分布全港各區，賣點係場館多同月費平，更可以按鐘計，認真抵玩。優點係分店多收費平，缺點係部份場館器材較殘舊，器材種類唔全面，只適合入門至中階健身玩家，而且部份場館間中會暫停開放使用，畀康文署健身班或團體租用，唔多唔少都會影響訓練行程。
康文署健身室入場費用
康文署嘅入場費用係根據你嘅使用資格而定，一般成人收正價，附合資格嘅學生、長者、傷健人士及其陪同者，可享優惠價。價錢方面，分時票及月票。
- 時票：正價每小時HK$13(非繁忙時間)及HK$14(繁忙時間，優惠價統一HK$7；
- 月票：正價每月HK$180、優惠價HK$90。
不過要留意，一般人唔係想做時去買飛就做得，而要事先獲得康文署健身室使用資格，最簡單就係報佢哋啲訓練班上幾堂。
各健身室比較列表
| 健身室品牌 | 最平月費 | 繳費方式 | 分店數目 | 免費試用 | 是否24小時 |
|---|---|---|---|---|---|
| 24/7 Fitness | HK$520(一年合約) | 合約+月繳 | 110 | 1日 | 是 |
| Anytime Fitness | 官網沒有提供 | 合約+月繳 | 31 | 1日 | 是 |
| Fit 24 | HK$349(一年合約) | 合約+月繳 | 9 | 1日 | 是 |
| Go24 Fitness | HK$550(一年合約) | 一次性預繳 | 10 | 1日 | 是 |
| Physical舒適堡 | HK$125(8個月合約) | 合約+月繳 | 15 | 7日 | 不是 |
| Pure Fitness | HK$2,099(一年合約) | 合約+月繳 | 21 | 5日 | 不是 |
| Snap Fitness | HK$168(4星期合約) | 合約+月繳 | 17 | 1日 | 是 |
| 康文署 | HK$13/HK$180 | 時票/月票 | 86 | 沒有 | 不是 |
延伸閱讀：康文署認可健身教練體適能證書課程
